Rom 6 | MMX | STEP | Ataba tong i xereva? Ataba lok do atak lox amisik laxakapmek kusu ne Moroa naba lox asilok letaba nabalamu ren tinedik?

Romans 6

Ik Lok At Ne Karisito

1 Ataba tong i xereva? Ataba lok do atak lox amisik laxakapmek kusu ne Moroa naba lox asilok letaba nabalamu ren tinedik? 2 Kopmen tinotno! I lok ngan do nedik digara met pam basinge laxapmek, kuren la nedik ataba rooro bok ba xeneng at laxapmek kereva? 3 Nemi mikleklen tinotno i na; at loxonaleng nedik diga lok kaka lesep susu keneng at laasen at ne Iesu Karisito, i lok ngan do nedik diga lok ka loxot at lanmet teren. 4 Kuren la mumu bok lesep susu atnedik, i lok ngan digak mit nedik eburu min la digak lox eburu min at lanmet teren kusu nedik bok ataba roo xat mi lorooro maxat, kerekngan ne Iesu ga roo xat amlong at lanmet mi lololos at ne Temen.

5 Do nedik gitak lox eburu min keneng at lanmet teren, nedik gitaba roo xat bok eburu min, ngan neni ga lok kuren. 6 La nedik taklen i na, lorooro maut atnedik gara met pam eburu mi ne Karisito ro vana at laxaba, kusu ri sele utut lololos at laxakapmek atnedik getgesara, la kusu nedik ata xok lok at loxokoxo at laxapmek, 7 atla do taradi na met, neni naba sepsu basinge lololos at laxapmek.

8 Do nedik taga met pam eburu mi ne Karisito, nedik ta nuunu do atanaba rooro bok eburu min. 9 Dik taklen i do ne Karisito gara roo xat pam at lanmet, la neni noxo met bok ba, atla lanmet kopmen na ruuna tololos ti lox asi i. 10 La lanmet neni gak lok teren, ni lanmet ti laxakapmek atnedik, la neni ga met gesara mene nga; la lorooro mo nga neni i rooro ren, ni lorooro i esogo rinotno eburu mi ne Moroa.

11 At na mun langas mina doma mu i na do nemi miga met basinge laxapmek, ketla miga roo xat la mit kis esogo eburu mi ne Moroa xeneng at lixitkis eburu atnemi mi ne Iesu Karisito. 12 Kuren la nemen mita ke laxapmek na lok tatao labantuxu gamasa atnemi mo naba met; la nemen mita ronga res at lavavara mun at labantuxu atnimi. 13 La nemen gat miguta raba tamangkot at labantuxu atnemi ri laxapmek, kusu mina lok levempanga xapmek. Ketla mina raba axa nemi ri ne Moroa, na ngan laradi ga ravasu at lanmet ti lorooro, la mina raba lorooro axap atnemi rin kusu rik lok lugugu i nunuan la ik mokso. 14 Nemen gat miguta ke xepe laxapmek nam lam nemi, atla nemi xopmen minak lok maxopok at loklok tatao at Lenavolo; ketla mik lok maxopok at letaba nabalamu at ne Moroa.

Lavaanat Saxaruki At Lomokmokso

15 Nedik dixok lok maxopok at Lenavolo, ketla dik lok maxopok at letaba nabalamu at ne Moroa. Kuren la ataba lok ba lavanga salai? Kereva, nedik atanak lok laxakapmek? Kopmen tinotno! 16 Mikleklen tinotno i do, mo do mina raba nemi ngan lavaanat saxaruki ring tonga res at tara vetpes, nemi mi lok ngan lavaanat saxaruki at laradi ming tonga res teren; kuren la nemi lavaanat saxaruki at laxapmek no im taba lanmet, kopla nemi lavaanat saxaruki at lorongtonga res no ba lam ka nemi ri lesepsepmus. 17 Ketla a tong loklox avukat tinotno ri ne Moroa. Gano nemi migak lok ngan lavaanat saxaruki at laxapmek; ketla melemu ren mi lorooro axap atnemi, miga ronga res at levelinga ruturun miga ronga i. 18 La miga sepmus basinge laxapmek, la miga lok ngan lavaanat saxaruki at loklok mokmokso.

19 A paase poovo mi lavaanat saxaruki la luvuttadi amgomgo atdi kusu minaba ronga xibis kaka na levelinga mila lunuunu atnemi kopmen na lolos. Gano nemi miga raba lorooro axap atnemi ri lugugu ngan lavaanat saxaruki at laxakapmek la laxangkakapmek solo. Kuren pam, la mina raba bok lorooro axap atnemi ngan lavaanat saxaruki ri lok leveloklok mokmokso la leveloklok i xaala. 20 At levenaleng migak lok ngan lavaanat saxaruki at laxapmek, miga sepsu basinge leventaangas at lomokmokso. 21 Miga ven livipisik sala at laxaloklok nemi migak lox i, la mo ba mira mamangan teren? Livipisik ap mo levempanga, ni lanmet! 22 Ketla, amo nga migara sepmus pam basinge laxapmek, la mo nga mi lok ngan lavaanat saxaruki at ne Moroa; mo lavanga nemi minaba lok kaka i, neni lorooro i xaala, la livipisik teren neni lorooro avolo. 23 Luunun at laxapmek, ni lanmet; ketla laramtaba at ne Moroa, ni lorooro avolo keneng at ne Iesu Karisito, Leeme Silok atnedik.